பறை இசை என்றால் என்ன?

பறை ஒரு தமிழிசைக் கருவியாகும். இது தோலால் ஆன மேளம். ‘பறை’ என்ற சொல் பேச்சைக் குறிப்பதாகும். ‘பேசு’ எனப்பொருள்படும் ‘அறை’ என்ற சொல்லினின்று ‘பறை’ தோன்றியது. (நன்னூல் : 458). பேசுவதை இசைக்கவல்ல தாளக் கருவி ‘பறை’ எனப்பட்டது. பன்னெடுங்கால வரலாற்றைத் தன்னகத்தே கொண்டுள்ள பறை, ஓர் இசைக் கருவி மட்டுமல்ல தொல்குடித் தமிழ்ச் சமூகத்தின் சொத்து, தோலிசைக் கருவிகளின் தாய். தமிழினத்தின் தொன்மையான அடையாளம். “உழைக்கும் மக்களின்” இசைக் களஞ்சியம். தமிழர் வாழ்வியலின் முகம் என வர்ணிக்கப்படுகிறது. “பறை” என்பது ஓடும் இசையை ஒழுங்கு பெற நிறுத்தி ஓர் அளவோடு சீரோடு, ஒத்த அழகோடு நடக்க, இசைக்கு நடை கற்பிக்கும் கருவி என “பறை’ ஆய்வு நூல் கூறுகிறது.

ஐந்திணை நிலத்தின் அடையாளமாகவும், அம் மக்களின் இசைக் கருவியாகவும் பறை இசையே இருந்துள்ளது.குறிஞ்சியில், தொண்டகச் சிறுபறை, முல்லையில் ஏறுங்கோட்பறை, மருதத்தில் தண்ணும்மை, நெய்தலில் மீன் கோட்பறை, பாலையில் ஆறெறி பறை என்ற பறையின் பெருமை குறிக்கப்பட்டுள்ளது.போரில் அடைந்த வெற்றியை பறையால் சாற்றியதை ”இசைப் பறையொடு வென்றி நுவல”என்று புறநானூறு கூறுகிறது.

திட்டைப் பறை, தொண்டகச் சிறுபறை, தொண்டகப் பறை, அரிப்பறை, மண்றோல் சிறுபறை, மென்பறை, இன்னிசைப்பறை, பொருநர் பறை, ஆடுகளப் பறை என “சங்க இலக்கியங்களில் “பல்வேறு பெயர்களில் ”பறை” குறிப்பிடப்படுகிறது.

உலகப் பொதுமறையாம் திருக்குறளில் ”அறைபறை யன்னர் கயவர்” என்றும், ”எம்போல் அறைபறை கண்ணாரகத்து” என்றும், ”அறைபறை நின்று மோதிட” என்றும் பறை ஓங்கி ஒலிக்கிறது.

இந்த தொன்மையான பறை இசை பயிற்சியை, நம் “தமிழ் மன்றத்தில்” கற்றுக் கொள்ள  “அன்புடன்”அழைக்கிறோம்.

https://youtu.be/-wIZmv6Dgg8?si=lK1nHejJMizR3JeY